Lydia og Sámal vunnu stuttsøgukappingina

Bókasavnið við Løkin skipaði aftur í ár fyri skrivikapping í samband við Mentanarvikuna í Runavíkar kommunu. 
Í ár skuldu luttakararnir skriva stuttsøgur, og mánakvøldið vórðu vinnararnir kunngjørdir á bókasavninum.  

49 stuttsøgur komu inn, og dómsnevndin valdi, at Sámál Soll skuldi hava 1. virðislønina fyri stuttsøguna "Síðsta orðið", og Lydia Didriksen fekk 2. virðisløn fyri stuttsøguna "Døgurðin".

Sámal og Lydia hava bæði skrivað nógv og givið út. Sámal Soll er cand.mag í enskum, rithøvundur og týðari, og gav millum annað út stuttsøgusavnið Glasbúrið í 2015. Í 2019 kom hann við stuttsøgusavninum Virus. 

Lydia Didriksen er fólkaskúlalærari, M.A. í føroyskum bókmentum og máli og rithøvundur, og hevur skrivað eina røð av barnabókum, eitt stuttsøgusavn og lagt fleiri skúlabøkur til rættis. Ofta er ungu gentan ella kvinnan høvuðspersónur, og í vaksnamammasøgunum verður sálardýpið ofta granskað. 

Ymiskar søgur við hugtakandi enda

Søgurnar hjá vinnarunum eru ymiskar í tíð og í evni, men hava báðar ein hugtakandi enda, sum kann tulkast uppá ymsar mátar. 

"Síðsta orðið" hjá Sámal Soll snýr seg um eina samrøðu millum tveir bankamenn í Havn um hugtakið "viager" - ein franskan máti at selja hús uppá. Føroyski bankin, har teir arbeiða, ætlar nú at veita hesa "tænastu" til sínar kundar. Stílurin í søguni kann sigast at vera nútíðarligur og realistiskur, og fleiri aktuell mál verða tikin upp. Søgan kann lesast sum eitt speiskt og kanska eitt sindur atfinningarsamt íkast til kjakið um bústaðarmarknaðin. 

Søgan "Døgurðin" hjá Lydia Didriksen er um ein døgurða, sum ein verdóttir fyrireikar til vermammu sína. Men tá vermammuni trínir inn, koma ósagdu ósemjur eisini á gátt. Søgan lýsir eitt føroyskt heim í eina stutta løtu ein sunnudag, og lesarin kennir, hvussu stórt vald ella ávirkan vermamman hevur, hóast hon sera lítið sigur. Ósemjurnar koma heldur til sjóndar við tøgn og kropsburði. Gjøgnum ungu gentuna í húsinum verða myndir, ið hanga á vegginum lýstar, og tær siga lesaranum, hvat fyri húski talan er um.

Sámal og Lydia halda, at tað er sera jaligt, at skipað verður fyri skrivikappingum, tí neyðugt er støðugt at fáa til vega nýggjan føroyskan skaldskap.

- Tað hevur týdning fyri føroyska málið, men eisini fyri okkara samleika sum føroyingar, halda tey.

Lurta eftir samrøðuni við Sámal Soll og Lydiu Didriksen her:

Kultura logo

Hvat: Kultura
Hvar: Í útvarpinum og á KVF Ljóð
Nær: Mikudagar kl. 17.05 í útvarpinum, og tá tað passar tær á KVF Ljóð