"Sýrublað" hjá Guðrið verður hátíðarhildin í Listastovuni í kvøld

Herfyri gav ein av størstu stjørnunum á føroyska tónleikahimmalinum, Guðrið Hansdóttir, sína sjeyndu plátu út.  

Plátan, ið ber heitið "Sýrublað", skilmarkar eitt skiftið í úttrykkinum hjá Guðrið Hansdóttir, har hon listarliga letur upp fyri einum nýggjum ljóðheimi, har tað ráa og tað mjúka ganga hond í hond.

Tónleikurin hevur sínar røtur í fólkapoppi, men leitar sær samstundis í fleiri ymiskar ættir og gevur rúm fyri bæði nærveru, ráleika og smálutum.

LES EISINI: Guðrið spælisjúk á nýggjari plátu

Útgávukonsert í Listastovuni

Í sambandi við útgávuna, so hevði Guðrið Hansdóttir fríggjakvøldið 17. apríl eina útgávukonsert fyri einum fullsettum í Norðurlandahúsi saman við sínum superbólki.

Bólkurin er mannaður við Høgni Lisberg á trummum, Benjamin Petersen á gittara, Vinjari Egilsnes Petersen á kláveri og ljómborðum, Árni Johannesarson á bass, og so syngur Marianna Winter Nagata kór. 

Guðrið og bólkurin spældu eisini eina útgávukonsert í Tøting leygarkvøldið 18. apríl. 

Guðrið Hansdóttir, Sýrublað

Nú er tað so Listastovan og fólk í Vágum, ið eiga tørn, tí í kvøld spældi Guðrið og bólkur hennara útgávukonsert í Listastovuni í Miðvági. 

Tekstirnir á útgávuni "Sýrublað" hava eitt tætt tilknýt til Vágoynna, tí teir eru skrivaðir av yrkjaranum Beini Bergssyni, ið er ættaður úr og býr í Sørvági. Í fleiri førum er talan um teksliga staðsetingar í oynni. 

SÍ EISINI: VIDEO: Guðrið ger ikki somu plátuna tvær ferðir

Smálutirnir fáa pláss

Í kvøld er so Listastovan karmur um nýggja tilfarið hjá Guðrið.

Tað tætta og intima rúmið ger, at tónleikurin sleppur at standa berur, og at sambandið millum tónleikarar og áhoyrarar verður tætt.

Tað er júst á slíkum pallum, at smálutirnir og nærveran fáa veruligt pláss.

LEITISSTEIN, Guðrið Hansdóttir

Í sambandi við útgávuna av "Sýrublað", so var Guðrið Hansdóttir gestur í sendingini LEITISSTEIN í útvarpinum. 

Har greiddi Guðrið frá um plátuna og alla tilgongdina við at gera hana. 

HOYR EISINI: Guðrið Hansdóttir - Beinleiðis úr Studio 5