Meistaradeildin: NSÍ kann fara undan

Oddadystur er í Meistaradeildini hjá monnum í kvøld.

Við sigri á B36 í Gundadali hevur oddaliðið NSÍ kjansin at fara fýra stig framum KÍ á 2. plássi. Vinnur B36 hinvegin, yvirhála teir hvítu og svørtu bæði KÍ og NSÍ og leggja seg fremst í deildini.

Í Sarpugerði í Gøtu tekur Víkingur ímóti 07 Vestur. Gøtumenn hava ikki fingið góða byrjan, men kunnu ota seg upp ímóti topp-fýra, meðan 07 Vestur hevur kjansin at sleppa burtur frá niðurflytingarstrikuni.

Tríggir dystir vóru í gjár, tá hvørki KÍ ella HB fingu fult á heimavølli. KÍ og Skála spældu málleysan javnleik, meðan dysturin millum HB og AB endaði 1-1. Tað endaði dysturin millum B68 og EB/Streym á Toftum eisini.

Dystirnir í kvøld byrja klokkan 18.30, og útvarpið sigur frá dystinum millum B36 og NSÍ.