Áhugafelagið Búgva: Leigustuðulin má koma nú

Nú lógaruppskotið um leigustuðul er komið aftur í løgtingið, fegnast áhugafelagið Búgva. 

- Nú er tíðin komin at tey, sum leiga bústað, fáa leigustuðul á sama hátt sum eigarar fáa renstustuðul, sigur Elin Hentze, talsfólk fyri Búgva, sum arbeiðir fyri fjølbroyttari bústaðarmøguleikum í Føroyum. 

Leigustuðulin, sum kann vera í mesta lagi 1500 krónur um mánaðin, skal sambært uppskotinum koma í gildi 1.september.

Verður lógaruppskotið samtykt, sum tað sær út ídag, fær tað gildi 1.september. Almannaverkið skal umsita leigustuðulin, og fólk skulu søkja um stuðulin har. 

Í minna lagi

Almanna- og bústaðarmálaráðið veit ikki, hvussu nógv leigustuðulin fer at kosta landskassanum. Ráðið nevnir tó sum dømi, at fáa 1200 húski í meðal 1200 krónur í leigustuðli um mánaðin - so kostar stuðulin 17 milliónir.

Við lógaruppskotinum kunnu tey, sum búgva til leigu, fáa upp til 20 prosent av húsaleiguni afturrindað sum stuðul úr landskassanum. Tó í mesta lagi 1500 krónur um mánaðin.

Leigustuðulin - sum verður latin hvørjum húski - er fyrst og fremst ætlaður fólki við lágum inntøkum.

Elin Hentze frá áhugafelagnum Búgva fegnast um uppskotið, men ásannar, at 1500 kr. eru í minna lagi.

18 partar hoyrdir

Lógaruppskotið hevur verið til hoyringar hjá 18 pørtum.

Landsfelag Pensjónista heldur at hægsti leigustuðul eigur ikki at vera 1500 krónur, men 3000 krónur um mánaðin.

Landsbankin heldur, at fólk sum eiga stóra fíggjarliga ogn, eiga ikki eisini at hava rætt til leigustuðul. 

Og Føroya Arbeiðsgevarafelag heldur, at inntøkumarkið fyri at fáa leigustuðul eigur at vera lækkað, so stuðulin í størri mun fer til tey, sum veruliga hava tørv á honum.

Lógaruppskotið um leigustuðul kemur til fyrstu viðgerð í morgin.