Búrhandilin fyllir 170 ár

- Eg føli eina ávísa ábyrgd og hugsi eisini um, hvør kann yvirtaka handilin aftan á meg.

Soleiðis sigur Kristoffer Poulsen, sum saman við konu síni eigur og rekur Búrhandilin í Skopun.

Í dag, 13. mai 2026, fyllir Búrhandilin 170 ár, tí henda dagin í 1856 lat handilin upp á fyrsta sinni.

Seinastu 36 árini hevur Kristoffer Poulsen havt handilin.

- Hetta er ikki bara eitt arbeiði, men faktisk ein lívsstílur, tí at hava ein slíkan handil, tað krevur nógv av tær. Tú mást veruliga tíma tað, sigur Kristoffer Poulsen.

Og ert tú handilsmaður í Skopun, ber illa til at halda frí.

- Um eg veruliga skal hava feriu, so má eg úr oynni ella uttanlands, tí tað vísir seg, at eri eg í Skopun, so fari eg altíð í handilin, sjálvt um eg eigi at halda frí, sigur Kristoffer Poulsen.

Í morgunsendingini greiðir hann frá søguni hjá Búrhandlinum, ið er millum elstu virkandi matvøruhandlar í landinum, og um lívið sum handilsmaður í Skopun.