Kanna føroyingar í Danmark

Føroyingar í Danmark skulu nú kannast.

Umfatandi kanning skal varpa ljós á lívið hjá føroyingum í Danmark og svara, hví summi flyta í lestrarørindum og velja at verða verandi í Danmark, og hví onnur flyta aftur til Føroya

Fróðskaparsetrið ger kanningina í samstarvi við Danmarks Statistik og Aarhus Universitet.

Hetta er størsta kanningin higartil av sínum slagi.

Allir føroyingar, sum eru fluttir til Danmarkar í minsta lagi eina ferð eftir 1999, og eru farnir undir yrkisútbúgving ella hægri útbúgving innan 12 mánaðir eftir, at teir eru fluttir, eru við í kanningini. 

Kanningin umfatar føroyingar, sum fluttu til Danmarkar og byrjaðu útbúgving fyri 1. oktober 2025.

Erika Anne Hayfield og Tróndur Møller Sandoy á Søgu- og Samfelagsdeildini á Fróðskaparsetrinum standa á odda fyri granskingarverkætlanini.