Mbappé, Yamal, Haaland og hinir í Kringvarpinum 

Hósdagin ljóðar fyrsta bríksl í heimsmeistarakappingini í fótbólti í Meksiko Kanada og USA, har heili 48 lond fara at kappast um gylta HM-steypið. 

Meksiko og Suðurafrika sparka tað heila í gongd á risastóra Estadio Azteca, sum eisini hýsti HM-finalunum í 1970 og 1986, tá Pelé og Maradona vóru stóru stjørnurnar. 

Hesa ferð eru størstu spælararnir Kylian Mbappé, Lamine Yamal og Erling Braut Haaland, meðan Lionel Messi og Cristiano Ronaldo eisini binda HM-lissurnar fyri seinastu ferð. 

Kringvarpið fer eisini at senda frá heimsmeistarakappingini frá byrjan í Meksiko býi nú hóskvøldið til finaluna á MetLife Stadium í New York 19. juli. 

Tað vera sendir útvaldar dystir beinleiðis í samstarvi við donsku rásirnar TV2 og DR.

Nærri kunning sæst í sjónvarpsskránni. 
 
HM-tíðindi og HM-poddvarp 

HM-tíðindi vera aftur at hoyra í útvarpinum. Hetta er ein gomul siðvenja í Kringvarpinum, og Suni Merkistein tekur táttin upp, tá bólkaspælið er liðugt.

Suni Merkistein var eisini at hoyra í Summarmorgni, har hann greiddi frá HM-endaspælinum og HM-tíðindunum, sum vera á døgurða frá mánaðarskiftinum.HM er størri enn nakrantíð við 48 liðum og 104 dystum, og tá bólkaspælið er liðugt og „røkk ella støkk“-dystirnir byrja, verður hann til reiðar at fylgja kappingini fram til finaluna.

Eisini fer Tróndur Arge at gera HM-poddvørp, sum kappingin líður. Hitt fyrsta lítur aftur á HM í USA í 1994.

Harumframt verða greinir og annað tilfar at síggja á kvf.fo.