Nýggjasta skipið hjá Navigare eitur Hav Leiti

Seinnapartin varð nýggjasta skipið hjá Navigare Shipping, MV Hav Leiti, doypt í Harlingen í Hollandi.

MV Hav Leiti er fyrsta av fýra systurskipum, sum Navigare Shipping letur byggja. Skipið er munandi størri enn tey skip, sum reiðaríið hevur í flotanum í dag. Tað er 90 metrar langt, góðar 15 metrar breitt og smá 4000 bruttotons. 

Hav Leiti

Skipið er eitt sonevnt General Cargo-skip, og sambært reiðarínum er stórur dentur lagdur á umhvørvisvinarligar loysnir, grøna orkunýtslu og at minka um útlátið. 

Maskinaríið er diesel-elektriskt, og skipið verður rikið við fýra el-motorum. Eisini er gravimaskinan á dekkinum el-rikin, sum er við til at minka um bæði orkunýtslu og útlát.

Hini trý systurskipini hjá MV Hav Leiti verða eftir ætlan latin reiðarínum Navigare seinni í ár og næsta ár.