Nýggj veljarakanning broytir einki

Politiska landslagið er lítið og onki broytt síðani løgtingsvalið 26. mars.

Tað vísir ein nýggj veljarakanning, sum Spyr.fo hevur gjørt fyri Portalin. 

Sambært kanningini hevði tingfólkabýtið verið óbroytt, um val var nú 

Fólkaflokkurin hevði varðveitt síni níggju, Sambandsflokkurin sjey, Javnaðarflokkurin og Tjóðveldi hvør síni seks, Framsókn og Miðflokkurin hvør sínar tveir og Sjálvstýri ein.

Veljarakanning og tingsessir

Broytingar í prosentbýti

Onkrar smærri broytingar eru tó í prosentbýtinum. 

Fólkaflokkurin fer hálvt annað prosentstig aftur, úr 27,7 prosentum á valinum og niður á 26,2. 

Sambandsflokkurin fær 21,7 prosent í veljarakanningini, sum er 0,2 prosentstig meira enn á valinum. 

Og Javnaðarflokkurin fær 19,3 prosent móti 18,9 á valinum.

Veljarakanning, prosentbýti

Tjóðveldi framgongd, Framsókn afturgongd

Í andstøðuni stendur Tjóðveldi til at vinna seg 1,3 prosentstig fram, úr 17,4 á valinum og upp í 18,7 í veljarakanningini. 

Framsókn fer 1,7 prosentstig aftur, úr 6,6 niður á 4,9 prosent. 

Miðflokkurin fer 0,6 prosentstig fram og lendir á 5,8 prosentum. Og Sjálvstýrið stendur í stað við 3,4 prosentum.

Ongin broyting er tó størri enn hagfrøðiliga óvissan í kanningini, sum er 3,3 prosent.

Spyr.fo gjørdi kanningina mánakvøldið 29. juni, og 500 fólk svaraðu.