Nýggj seinnapartssending byrjar í dag

Summarið er komið, og við nógvum góðum summardøgum fyri framman kemur nú eisini nýggj summarsending á skránna. Hvønn týsdag, mikudag og hósdag klokkan 13 eru vertirnir Eyðfinn Jensen og Kristina Sundstein til reiðar í útvarpinum, meðan tú málar húsini, ert til arbeiðis, gongur túr, arbeiðir í urtagarðinum ella nýtur alt tað, sum summarið hevur at bjóða. 

Í Summarbeiti verða góðar samrøður, gestir, sum detta inn á gólvið, frískur summartónleikur og pláss fyri tí óvæntaða, sum hoyrir summarinum til. 

Í sendingini verða eisini spennandi kappingar, har møguleiki verður at vinna góðar vinningar. Sendingin fer eisini út um útvarpsstovuna og á vitjan kring landið. Millum annað verður leiðin løgd fram við G! Festivalinum í næstu viku. 

Summarbeiti byrjar í dag klokkan 13 og verður á skránni alt summarið.