Zelensky biður NATO um hjálp

Í seinastuni hava russar skotið ógvusligar ríður av rakettum móti urainska høvuðsstaðnum Kyiv, og nú biður ukrainski forsetin, Volodymyr Zelensky, NATO-lond um hjálp.

Hann kom í morgun til turkiska høvuðsstaðin, Ankara, har hann skal vera við á NATO-toppfundinum, sum er í dag og í morgin.

Sambært bretska kringvarpinum, BBC, ætlar Zelensky at brúka NATO-toppfundin til at royna at útvega ukrainum betri loftverjuskipanir og -vápn.

Veikleikarnir í ukrainsku loftverjuni sóust týðiliga undir hørðu russisku álopunum á Ukraina hósdagin og gjáranáttina, tá hópin av rakettum raktu Kyiv, millum annað íbúðarbygningar. 

Meira enn 50 fólk tilsamans lótu lív í álopunum.

Ukraina tørvar loftverjuskipanir, sum er førar fyri at skjóta russisku rakettirnar niður ella oyðileggja tær.

Ukraina oyðilagt russisk oljureinsiverk

Russisku álopini eru komin í kjalarvørrinum á fleiri væleydnaðum ukrainskum dronuálopum inni í Russlandi, har tað millum annað hevur eydnast teimum at oyðileggja fleiri oljureinsiverk.

Tí er álvarsligt trot á brennievni í Russlandi í løtuni, og streymurin er óstøðugur.

Herdu russisku rakettálopini eru helst eitt aftursvar uppá ukrainsku dronuálopini, og hava avdúkað, hvussu illa útgjørd ukrainska loftverjan er.

Undan NATO-toppfundinum segði Zelensky, sambært BBC, at hann vónaði, at talan ikki bara bleiv um ein fund uttan innihald.

Hann kann í hvussu er rokna við vælvild frá aðalskrivaranum í NATO, Mark Rutte, tí hann mælti undan fundinum limalondunum til at "gera sítt arbeiði og tryggja, at Ukraina fær tað, tey hava brúk fyri, fyri at kunna verja sín suverenitet."