Thomsen fer nú eisini at veita olju í Suðuroy

Sp/f Thomsen hevur gjørt sáttmála við Landsverk um at veita gassolju til landsins bygningar. Sáttmálin ger, at felagið frameftir eisini kann veita olju í Suðuroy, sigur Tórhallur Thomsen, stjóri.

Felagið átti bíligasta tilboðið av trimum.

Sambært avtaluni fær Landsverk oljuna fyri listaprís, umframt at avsláttur verður latin. 

Tórhallur Thomsen

Landsverk upplýsir, at veitingin fer at fevna um umleið 1,5 milliónir litrar um árið, men nøgdirnar kunnu minka næstu árini, so hvørt sum lagt verður um til grønar orkukeldur.

Tað var í novembur í fjør, at Sp/f Thomsen tók kappingina upp móti teimum báðum táverandi Magn og Effo  á føroyska marknaðinum. So í eitt hálvt ár hevur Sp/f Thomsen selt gassolju í kapping við hini bæði feløgini.

Landsverk upplýsir fyri Kringvarpinum, at avtalan fevnir um umleið 90 bygningar kring alt landið, sum brúka gassolju.

Um munin millum tilboðini sigur Landsverk, at tað lægsta er 0,852 krónur bíligari enn næstlægsta tilboðið, og tað er fyri hvønn litur.

Við nýggja sáttmálanum sparir landið umleið 400-500 túsund krónur um árið, samanborið við verandi avsláttarskipan.

Hoyr innslag í útvarpstíðindunum: