Meistaradeildin: Obbekjær bjargaði NSÍ í yvirtíðini

Daniel Obbekjær bjargaði NSÍ eitt stig í toppbrakinum móti KÍ, tá hann stakk seg upp og skallaði útjavnandi málið í netið langt inni í yvirtíðini við Djúpumýru. 

KÍ fekk ikki ruddað bóltin burtur, og so kundi hávaksni danski miðverjin seta pannuna á innleggið úr høgru síðu til 2-2. 

Tað var annars KÍ, sum leingi hevði tamarhald á dystinum. Tað var málleyst í steðginum, men í seinna hálvleiki løgdu Filip Brattbakk og Páll Klettskarð heimaliðið framum við einum skallara í part.

Tá bendi alt á, at meistararnir skuldu fara við øllum og leggja seg á odda í deildini, men tá Petur Knudsen minkaði um munin sjey minuttir fyri leiklok, broyttist dysturin.

Júst tað málið kom eftir hálvvánaligari roynd at sparka bóltin burtur frá KÍ-miðverjanum Gaston Tellechea og skjótt NSÍ-mótálop.

 - Tað er ókonsentratión í verjuni, har ein miðverji "clearar" við uttarsíðu, sum er ófyrigeviligt, inn í banan, og tá vita vit, at NSÍ'ararnir eru sterkir upp á kontraálopini har frá, og so er hatta ein av teimum. Petur (Knudsen, blaðm.) bombar hann uppundir nettakið, segði Árni Frederiksberg, sum átti uppleggi til bæði málini hjá heimaliðnum.

Úrslitið ger, at NSÍ framvegis er trý stig frammanfyri KÍ, nú sjey dystir eru eftir at spæla, og tískil hevur FM-lagnuna í egnum hondum. 

Sær svart út hjá B68

HB misti kjansins at nærkast oddaliðunum, tá tað ikki eydnaðist havnarliðnum, sum annars hevur vunnið seks dystir á rað, at skora ímóti 07 Vestur í Gundadali.

EB/Streymur fekk luft í botnstríðnum við 2-0 heimasigri á AB, og Skála kom uppum niðurflytingarstrikuna við 1-0 sigri á B68 í botngýsaranum á Svangaskarði.

Markus Hellisdal skoraði sigursmálið við brotssparki, tá eitt lítið korter var eftir at spæla.

Úrslitið ger, at tað nú sær svart út hjá B68. Toftamenn eru niðastir við 15 stigum og hava fimm stig upp til Skála á 8. plássi. Harumframt er málmunurin níggju mál verri.