Bátar til Ukraina ikki smíðaðir enn

Teir báðir skjóttgangandi bátarnir, sum føroyingar í fjør summar lovaðu ukrainum, eru ikki smíðaðir enn. 

Bátarnir eru á fíggjarlógini í ár, men verða væntandi ikki klárir fyrr enn næsta ár, verður sagt úr Uttanríkisráðnum.

Tað var miðskeiðis í juli í fjør, at Sirið Stenberg, sum tá var landsstýriskvinna í uttanríkismálum, vitjaði forsetaborgina í Ukraina, og lovaði Volodymyr Zelenskyj, forseta, tveir skjóttgangandi bátar, sum skuldi smíðast í Føroyum.

Fýra milliónir krónur vóru settar av á fíggjarlógini í ár til bátarnar. 

Sirið Stenberg og Zelenskyj

Bátarnir eru ikki smíðaðir enn, og orsøkin er, at samskiftið við ukrainar, um hvussu bátarnir skulu útgerast, hevur verið gjøgnum donsku verjuna - Forsvarets Materiel- og Indkøbsstyrelse.

Hetta samskiftið hevur tikið longri tíð enn ætlað, sigur Herálvur Joensen, aðalstjóri í Uttanríkismálaráðnum, í skrivligari viðmerking til Kringvarpið.

Avtala er gjørd við bátasmiðjuna Brim Boats á Eiði í summar, og bátarnir verða væntandi klárir at avhenda á vári í 2027, skrivar Herálvur Joensen.

Hoyr innslag í útvarpstíðindunum: