Løgtingið tekur undir við at yvirtaka málsøkið rúsandi evni

Løgtingið tekur undir við, at Føroyar yvirtaka málsøkið, sum eitur rúsandi evni.

Trivnaðarnevndin tekur undir við uppskotinum hjá Eyðdis Hartmann Niclasen, landsstýriskvinnu, um at flyta myndugleikan úr Danmark til Føroya.

Uppskotið um sjálva yvirtøkuna, sum løgmaður hevur lagt fram, er í uttanlandsnevndini.

Uttanlandsnevndin hevur fund mikudagin, og hevur innkallað løgmann.

Felagsmál

Málsøkið er í løtuni felagsmál, hóast tað verður umsitið og í høvuðsheitum fíggjað í Føroyum.

Tá málsøkið er yvirtikið, vera allar ásetingar, sum nú eru galdandi í Føroyum, og ikki stríða móti  heimastýrislógini, verandi í gildi, til tær vera broyttar ella avtiknar.

Heimildir og skyldur hjá donskum myndugleikum vera fluttar til føroyskar myndugleikar.

Lógin um yvirtøkuna skal setast í gildi 1. januar.