Foreldur mugu bíða longri eftir broytingunum í barsilskipanini

Í januar í ár varð boðað frá, at broytingarnar í barsilsskipanini eftir ætlan skuldu koma í gildi 1. januar 2027.

Hetta kom fram í svari frá Margit Stórá, landsstýriskvinnu, til ein § 52a-fyrispurning frá Súsonnu Bertholdsen, løgtingskvinnu.

Men nú sigur Margit Stórá tó, at broytingarnar væntandi verða framdar á vári 2027.

Nýggja samgongan vil eisini broyta barsilsskipanina

Í samgonguskjalinum frá apríl í ár stendur, at barsilsskipanin skal gerast smidligari, so foreldur sjálvi kunnu leggja barsilin til rættis.

Í ólavsøkurøðuni í ár endurtók Beinir Johannesen, løgmaður, ætlanina.

Samgongan hevur sett sær fyri, at foreldur skulu kunna drýggja barsilin við at býta útgjaldið yvir eitt longri tíðarskeið, um tey ynskja tað.

Eisini skal hámarkið fyri mánaðarligt útgjald úr Barsilsskipanini hækka upp í 60.000 krónur, umframt at ein skattafríur barnakekkur á 20.000 skal krónur latast, tá eitt barn verður føtt.

Nýggja kt-skipanin verður ikki tøk fyrr enn í apríl

Samstundis sum arbeitt verður við at broyta barsilsskipanina, verður ein nýggj kt-skipan ment til at umsita barsilsútgjaldið.

Fyri knøppum tveimum vikum síðani, játtaði Løgtingið 2,5 milliónir krónur afturat til menningina.

Upprunaliga vóru 11 milliónir krónur játtaðar, og samlaði kostnaðurin er nú 13,5 milliónir krónur.

TAKS metir, at nýggja kt-skipanin kann takast í nýtslu 1. apríl 2027.
 

Endamálið við nýggju kt-skipanini er millum annað at fáa eina meira talgilda og brúkaravinarliga skipan fyri foreldur, arbeiðsgevarar og umsitingina. Nýggja skipanin skal eisini vera løtt at tillaga til

framtíðarbroytingar á barsilsøkinum.

Kt-skipanin er ikki ein fortreyt fyri at gera ætlaðu broytingarnar.