Kringvarpið sendir handanina av M.A. Jacobsens virðislønunum beinleiðis

Fyri fyrstu ferð í nógv ár verða virðislønir M.A. Jacobsens ikki latnar í Müllers pakkhúsi.

Í ár verða tær latnar í auluni í Finsen klokkan 17 í dag. 

Onnur broyting er, at barnamentanarheiðursløn Tórshavnar býráðs nú eitur M.A. Jacobsens virðisløn fyri barnamentan. 

Fýra virðislønir verða latnar, og tær eru 75.000 krónur hvør:

• M.A. Jacobsens virðisløn fyri fagrar bókmentir
• M.A. Jacobsens virðisløn fyri yrkisbókmentir 
• M.A. Jacobsens virðisløn fyri mentanaravrik
• M.A. Jacobsens virðisløn fyri barnamentan (áður barnamentanarheiðursløn Tórshavnar býráðs)

Kvinnukórið Fljóðljóð syngur, og Heidi Lava Elgeirsdóttir, forkvinna í mentanarnevndini hjá Tórshavnar býráði, bjóðar vælkomin.

Elsa Berg, borgarstjóri, handar virðislønirnar. 

Kringvarp Føroya sendir handanina beinleiðis í sjónvarpinum, umframt at hon verður stroymd her á heimasíðuni klokkan 17.