Rúsdrekkaforboð í grønlendskari kommunu

Fyri at verja børnini, setir grønlendska kommunan, Kujalleq, nú forboð fyri at selja rúsdrekka.

Sølan av rúsdrekka, hevur ov nógvar óhepnar avleiðingar. Av teirri orsøk er tørvur á einum fyribils rúsdrekkaforboði.

Tað er boðskapurin hjá borgarstjóranum, Malene Wahl Rasmussen, úr flokkinum Demokratiit.

Kujalleq liggur í Suðurgrønlandi og tað búgva stívliga 6.000 fólk í kommununi.

- Vit kunnu ikki bara sita hendur í favn og hyggja at keðiligu avleiðingunum, sum nýtslan av rúsdrekka hevur fyri okkara umhvørvi, skrivar hon í tíðindaskrivi sambært grønlendska miðlinum Sermitsiaq.

Hon hevur heitt á grønlendska landsstýrið, Naalakkersuisut, um at seta forboð fyri at selja - og skeinkja - rúsdrekka. Landsstýrið hevur gingið umbønini á møti.

- Endamálið við einum fyribils rúsdrekkaforboði, er at taka burtur hóttanina móti tørvi barnsins og at verja fólkið, skrivar Naalakersuisut um avgerðina.

Rúsdrekkaforboðið var sett í gildi í gjár, men tað er ógreitt, hvussu leingi forboðið verður.

Hetta er ikki fyrstu ferð, at rúsdrekkaforboð er í pørtum av Grønlandi.

Undir koronufarsóttini var forboð sett fyri at skeinkja rúsdrekka, sum var sterkari enn 2,25 prosent í Nuuk og Kapisillit, skrivar Ritzau-tíðindastovan. 

Grundgevingin tá var, at man vildi verja børnini, sum vóru nógv við hús undir farsóttini.