- Tíðindi, mentan og ítróttur
Zelenskyj vil hava vápnahvíld

Ukrainski forsetin, Volodymyr Zelenskyj, bjóðar evropiskum umboðum vælkomnum at luttaka í næsta umfari av friðarsamráðingunum við Russland, undir leiðslu av USA.
Hann vónar, at samráðingarnar fara at snúgva seg um vápnahvíld og at minka kríggið í stigum, skrivar Reuters.
Zelenskyj tosaði við fjølmiðlar í Dublin í gjár, har hann er við á evropiskum toppfundi.
Har hitti hann serligu amerikonsku sendimenninar, Steve Witkoff og Jared Kushner.
- Tað hevur týdning, at glið er komið á. Vit samdust um at arbeiða fyri eini dagsskrá, sum snýr seg um at minka kríggið, og fáa okkurt slag av vápnahvíld. Eg vóni, at vit fáa slíka dagsskrá, segði Zelenskyj.
Kushner: Evropa má vera við
Jared Kushner sigur, at tað ber ikki til at fáa semju um kríggið í Ukraina uttan at Evropa er partur av samráðingunum.
Hann segði, at tað er umráðandi, at glið nú er komið á friðartilgongdina aftur.
Fyrr í vikuni hittust partarnir í Abu Dhabi. Tað vóru fyrstu samráðingarnar í níggju mánaðir.
Tíðliga í gjár boðaði Steve Witkoff frá, at nýtt samráðingarumfar verður skjótt, og at evropisk umboð vera við.
Fráboðanin kom eftir, at hann og Kushner høvdu verið á fundi við russiska forsetan, Vladimir Putin, í Moskva.



























