Henrietta og Durita í finaluni

Í dag eru hálvfinalurnar og finalurnar í borðtennis á skránni. Og Føroyar hava longu spælt seg í finaluna í tvímansleiki hjá kvinnum. 

Dysturin var í móti Gotlandi, og Føroyar vunnu 3-1 við sett úrslitunum 11-8, 6-11, 11-7 og 11-9.

Durita F. Jensen og Henrietta Nielsen vunnu silvur í Jersey fyri tveimum árum síðani, og nú hava tær sum tað allarminsta vart sítt annað pláss, og hava møguleika at vinna gull.

Síðani 1987 hevur borðtennis verið við á øllum oyggjaleikum uttan í Bermuda í 2013. Úrtøkan hesi árini er 1 gull, 4 silvur og 10 bronsu.