Føroysk turnusskipan ávegis

Í løtuni lesa okkurt um 80 føroyingar til lækna í Danmark. Sambært felagnum fyri føroyskt læknalesandi, vilja tey flestu til Føroyar í turnus.

Sirið Stenberg, landsstýriskvinna í heilsumálum, sigur í svari til Katrina Kallsberg, løgtingskvinnu, at Heilsumálaráðið skal hava ein fund við Det Regionale Råd for Lægers Videreuddannelse í Region Øst í Danmark fyrst í september um møguleikan at stovna eina føroyska KBU-skipan.

Í fyrsta umfari verður talan um eina royndarskipan. Riggar hon ikki, ber til at venda aftur til verandi skipan. Sum er, eru føroyingar saman við dønum við í lutakastinum um turnusplássini í Føroyum. 

Sambært felagnum fyri føroyskt læknalesandi, vilja tey flestu av teimum 80 føroysku læknalesandi til Føroyar í turnus. Ein teirra, ið eftirlýsir eina serskipan innan føroyska heilsuverkið fyri føroysk læknalesandi er Jón Rafael Clementsen, ið ynskti at sleppa til Føroya í turnus, men endaði í Silkeborg. 

Grønlendska heilsverkið hevur egna turnusskipan fyri læknalesandi. Anne-Marie Ulrik, fyrrverandi læknastjóri í Grønlandi, segði við Kringvarpið herfyri, at skipanin er beinleiðis orsøk til, at flestu nýutbúnu grønlendsku læknarnir koma heimaftur at arbeiða eftir loknan lestur. 

Hóast ein serføroysk turnusskipan verður sett á stovn, er umráðandi fyri Heilsumálaráðið, at hendan skipan er sum tann danska, so læknarnir eru tryggjaðir somu møguleikar sum læknar í donsku skipanini eftir lokið turnus í Føroyum. Sambært Sirið Stenberg, landsstýriskvinna í heilsumálum, so heldur Det Regionale Råd for Lægers Videreuddannelse, at møguleiki er fyri samstarvi við tey um skeið og annað, um vit stovna eina føroyska turnusskipan.