Handilspolitikkur og Huawei á skránni

03.12.2019 - 19:40
AktueltPolitikkur
Handilspolitikkur og Huawei á skránni
Spurdur beinleiðis, um handilspolitikkur og Huawei vórðu knýtt saman, sigur kelda hjá Kringvarpinum - "tað kanst tú sjálvur rokna út"

Tak niður

Ein kelda í landsstýrinum váttar, at kinesiski sendimaðurin Feng Tie vildi tosa um samstarvið millium Føroya Tele og Huawei og um handilsviðurskiftinini millum londini á vitjanini 11. november.

 

Í gjár fekk Kringvarpið fútaforboð fyri at endurgeva, hvat var sagt á fundinum millum løgmann, landsstýrismannin við ábyrgd av Føroya Tele og kinesiska sendiharran. Men tað vóru tveir fundir hendan dagin. Tað sæst í innlitinum, sum Kringvarpið hevur fingið. Fyrri fundurin var klokkan kvart yvir átta sama morgun millum Jenis av Rana og Feng Tie. Embætisfólk luttóku eisini á fundinum. Hesin fundurin var bert, tí Jenis av Rana skuldi av landinum í arbeiðsørindum og tí ikki kundi luttaka á fundinum, sum Kringvarpið hevur fingið fútabanna móti at endurgeva frá. Hetta var samstundis annar fundurin millum kinesiska sendiharran og Uttanríkismálaráðharran, síðani nýggja landsstýri tók við. 

 

Keldan hjá Kringvarpinum, sum vil vera dulnevnd, váttar, at fundurin snúði um samstarvsavtaluna millum Huawei og Føroya Tele. Keldan váttar eisini, at nert var við handilsviðurskiftini landanna millum. Spurdur beinleiðis, um hesi vóru knýtt saman, sigur keldan,  - at tað kanst tu sjálvur rokna út. 

 

Landsstýrið er fangað sum lús millum tvær negl í einum handils og trygdarpolitiskum stríði millum USA og Kina, orsakað av samstarvsavtaluni millum Føroya Tele og Huawei. Kinesar er ikki teir einasti, ið hava bankað á dyrnar í Tinganesi. Amerikanska sendikvinnan Carla Sands blandaði seg óvanliga beinleiðis upp í føroyskan innanríkispolitikk, tá hon í Sosialinum fríggjadagin heitti á føroysku telefeløgini og føroyskar myndugleikar um at kvetta øll bond til kinesisku fyritøkuna.  

 

Sí innslag í Degi og Viku í kvøld við at trýsta á pílin á myndini. 

 
 
Nýggjastu sendingar í ÚV
Mikudag 11. desember
Morgunlesturin mikumorgunin 11. desember 2019
102059
Týsdag 10. desember
Breddin
102050
Týsdag 10. desember
Góðan morgun Føroyar 10. desember 2019
102024
Týsdag 10. desember
Morgunlesturin týsmorgunin 10. desember 2019
102058
Nýggjastu sendingar í SV
Sunnudag 8. desember
Andakt við Marjuni í Kálvalíð
101975
Sunnudag 8. desember
Møti úr Nebo á Toftum
101977
Leygardag 7. desember
Úr savninum: Frætt & fregnað 11:12
101962
Leygardag 7. desember
Úr savninum: Matur og matgerð - røst riv
101961