Málið er Everest

Málið er Everest
Jákup Petur Eliassen hevur sett sær fyri at súkkla 8848 sokallaðar hæddarmetrar ella tað, sum í súkkluheiminum verður kallað ein 'Everest'.
11.06.2020 - 16:08

Tú velur tær eina brekku og súkklar hana umaftur og umaftur, til tú hevur súkklað 8848 sokallaðar hæddarmetrar. Einasta krav er, at teinurin skal súkklast í einum uttan at sova.

Tað ljóðar einfalt, og er tað kanska eisini. Men lætt er tað ikki.

Kortini er tað hetta, sum Jákup Petur Eliassen hevur sett sær fyri.

 - Hetta við 'everesting' er nakað, sum eg altíð havi droymt um, og kappingar og venjingarlegur hjá mær uttanlands vórðu allar avlýstar, so eg hugsaði, at "tað hevði verið ræðuliga stuttligt, at roynt", sigur triatleturin.

Okkara lívstílur er ov makligur

Jákup Petur Eliassen fer nú at royna at útinna bragdið. Hann hevur valt sær brekkuna úr Krákugjógv niðan á Húsareyn.

Brekkan er tríggjar kilometrar long og gevur 211 hæddarmetrar hvørja ferð. Tað vil siga, at hon skal súkklast ikki minni enn 42 ferðir. Samlaði teinurin verður umleið 250 kilometrar - helvtin í harðari mótbrekku.

 - Eg haldi, at okkara nýmótans lívsstílur er sera tryggur. Alt er heitt og fjálgt, tað eru eingir vandar og eingin pína av nøkrum slag. Tað er ov lítið áhugavert, sigur Jákup Petur Eliassen.

Honum dámar at bjóða sær sjálvum av og kenna tað, sum ekstremítróttur hevur við sær.

 -  Tú elskar alt og øll eina løtu, men løtu seinni er alt øgiliga hart, og tú tekur synd í tær sjálvum og ynskir at liggja heima í songini. Upp og niður, tað er stuttligari, sigur triatleturin.

Ætlar at taka danska metið

Jákup Petur Eliassen er greiður yvir, at tað als ikki er vist, at hann klárar at súkkla teir 8848 hæddermetrarnar. 

Mótbrekkan er ikki yndisdisiplinin - hann vigar smá 90 kilo - men hann hevur góðar vónir kortini. 

 - Um eg klári helvtina við beinunum, má viljin bera meg ígjøgnum seinnu helvtina, sigur hann. 

Og hann hevur eisini gott eyga á danska metinum, sum er 17 tímar og 8 minuttir.

 - Tað er kanska veruleikafjart, men tað hevði verið stuttligt, og eg ætli at royna at taka tað.

 
Er kopiera
Nýggjastu sendingar í ÚV
Nýggjastu sendingar í SV
Týsdag 17. september
Veðrið
180822
Mánadag 16. september
Dagur og vika við 3-2 - teknmálstulkað
180769
Mánadag 16. september
3-2 (16. september 2024)
180768
Sunnudag 15. september
Møti úr Hebron í Leirvík
180712
Leygardag 14. september
Veðrið - teknmálstulkað
180673