Ikki besta tíðin at fiska makrel

-Hóast makrelkvotan er hækkað 55 prosent, so megna virkini á landi væl at taka ímóti øllum makrelinum. Men tíðin er vánalig til dygdina á fiskinum, og tað kemur eisini at ávirka prísin, sum verður munandi lægri enn vanligt, sigur Jóhan Páll Joensen.

Tá tað var greitt, at eingin felags semja fæst um makrelfiskiskapin í ár, ásettu Føroyar sær týsdagin sína egnu kvotu, sum verður heili 167.000 tons.Tað eru 60.000 tons meira enn føroyska heildarkvotan í fjør.

Kunngerðin, sum býtir makrelin millum skipabólkarnar, er ikki lýst enn. Jacob Vestergaard, landsstýrismaður í fiskivinnumálum, sigur at í útgangsstøðinum fara allir bólkar at fáa sín lutfalsliga part av øktu kvotuni.