Rani Allansson Dalsgarð silvur í kapping í Rumenia

Rani Allansson Dalsgarð fekk í dag annað plássið í sterkari kapping í amboðsfimleiki í Rumenia.

Hann fekk annað plássið á gólvinum í kapping við rumenskar og ungarskar fimleikarar. Rani Allansson Dalsgarð fekk 13,65 stig, meðan vinnarin úr Ungarn fekk 14,20 stig.

 - Eg eri væl nøgdur við seriuna sum heild, men eitt mistak í stemminum var størri enn væntað og taldi 0,5 niður. Hetta gjørdi, at munurin millum meg og nummar eitt bleiv størri enn væntað. Hevði eg ikki gjørt hendan feilin, so hevði eg kanska vunnið gull, sigur Rani Allansson Dalsgarð.

 - Men eg eri sera væl nøgdur við lopini, sigur hann.

Tríggir aðrir fimleikarar vóru við í kappingini, sum kallast Romgym Trophy Artistic Gymnastics. Aron D. Jacobsen, Hjálmar A. Dalsgarð og Tóki J. Strøm umboðaðu eisini Føroyar, men teimum eydnaðist ikki at fáa nakað heiðursmerki.

Sí gólvseriuna hjá Rana Allansyni Dalsgarð omanfyri.