Landsliðsvenjarin: vit vóru ikki nóg góðir hesaferð

Tað gekk væl, til tað ikki gekk væl longur.

Føroyska landsliðið vardi væl fyrsta hálva tíman ímóti alsamt meir ørkymlaðum heimaliðið, og var eisini á vitjan í turkiska brotsteiginum viðhvørt.

Korthúsið rapaði kortini, tá Cengiz Ünder legði heimaliðið framum átta minuttir fyri steðgin.

Eftir hetta steðgaði í roynd og veru upp hjá føroyingunum, sum ikki megnaðu at halda upp á bóltin, og tískil vóru undir trýsti tað, ið eftir var av dystinum. 

Føroyar vóru ikki nóg góðar, viðgekk landsliðsvenjarin, Håkan Ericson, eisini, eftir 4-0 tapið.

 - Vit mugu bara ynskja Turkalandi til lukku og slikka sárini, staðfesti hann.

Håkan Ericson heldur, at liðið stóð seg nøkulunda fyrsta hálva tíman, tá orkan og spenningurin bar liðið fram.

 - Ta løtuna høvdu vit neyðugu orkuna, og so leingi máltalvan sigur 0-0, er spenningurin og tankin um, at alt kann henda, har, sigur Håkan Ericson.

Eftir at Turkaland fekk tvey stutt undan og eftir steðgin, fór luftin eitt sindur úr ballónini, og hóast roynt var við trífaldaðari utskifting og broyting í spælskipanini, bataði lítið.

 - Vit kundu lagt okkum enn longur aftur og vart burturav, men tá teir komu framum, máttu vit onkursvegna royna at svara aftur, sigur landsliðsvenjarin.

Týskvøldið spælir Føroyar aftur í Nations League. Mótstøðuliðið a Tórsvølli verður Luksemburg, sum vann sín fyrsta dyst 2-0 á Litava.