- Tíðindi, mentan og ítróttur
Umhvørvisstovan sett upp á pláss
Børn skulu fáa eftirnavnið hjá sammóður, og sammóðir skal skrásetast í Landsfólkayvirlitið.
Tað hevur Magnus Rasmussen, landsstýrismaður, givið sínum egna stovni, Umhvørvisstovuni, boð um í dag.
Stovnurin hevur higartil bæði sýtt fyri hesum skrásetingum og ráðgivið um tað sama.
Sigurð í Jákupsstovu, stjóri í Umhvørvisstovuni, vil ikki koma í sjónvarpsstovuna at tosa um málið. Hann sigur, at stovnurin nú fer at viðgera boðini frá landsstýrismanninum.
Poul Geert Hansen, aðalstjóri í Mentamálaráðnum, sigur, at Mentamálaráðið fer ikki at seta seg ímóti tulkingini hjá Umhvørvis- og Vinnumálaráðnum, sum er tulkingarmyndugleiki á økinum. Tó heldur hann, at málið skal viðgerast nærri.
Magnus Rasmussen, landsstýrismaður í Umhvørvis- og Vinnumálum, vil ikki gera samrøðu, men sigur, at hann væntar, at Umhvørvisstovan og harvið Landsfólkayvirlitið fer at gera eftir boðunum frá honum.


















