Ónøgd við hagalógina

Átta av tíggju føroyingum taka ikki undir við verandi skipan um gongd í haga. Tað vísir ein kanning, sum Visit Faroe Islands hevur gjørt.
Spurd, um vit skulu hava nýggja lóggávu við felags loysn fyri alt landið, sigur ein greiður meiriluti av føroyingum "Ja" - bæði fólk í Havn og í útjaðaranum. 
Spurd, um bøndurnir sjálvir skulu sleppa at áseta gjald, siga flestu av teimum spurdu "nei", men har er munurin eitt vet størri millum høvuðstað og útjaðaran.
Nógvir føroyingar taka eisini undir við uppskotinum hjá Visit Faroe Islands, um at ferðafólk skulu rinda eitt náttúruverndargjald, tá tey koma til Føroyar. 
Og at enda heldur ein greiður meiriluti av teimum spurdu, at ein almennur gongurættur eigur at verða settur í verk í Føroyum.
Hjá Visit Faroe Islands halda tey, at okkurt eigur at verða gjørt, um hetta er hugburðurin millum føroyingar.