Samuel: Tað hevur verið ordiliga hart

Tað sær ljósari út nú.

Í januar fór tá 18 ára gamli Samuel Chukwudi úr HB til belgiska felagið Union Royal St. Gilloise. 

Eitt fremmant land við aðrari mentan og máli bíðaði tannáringinum, sum harafturat var skaddur. Knøini hava darvað so mikið illa, at tað er ikki fyrrenn nú - eitt ár seinni - at gávuríki miðverjin er aftur á vøllinum.

 - Tað hevur verið eitt sindur hart í byrjanini, tað má eg viðurkenna, sigur Samuel Chukwudi.

 - Eg var skaddur, tá eg kom, og at flyta til eitt nýtt land og ein stórbý sum Brússel er ikki bara bara. Men nú eri eg so at siga komin yvir skaðan, og venji og spæli fult við, so nú byrjar at síggja ljósari út.

Mentur í mótgongd

Samuel Chukwudi kom inn á besta mansliðið hjá HB sum 16-17 ára gamal, og avrikini vóru somikið sannførandi, at hann vann heiðurin 'ítróttastjørnuskotið', sum ÍSF letur.

Bruni í knøunum hevur kortini argað illa, og tá belgiska felagið Union lá framvið, var tað í fyrsta umfari við tí fyri eyga at geva unga miðverjanum viðgerð og endurvenjing fyri skaðan.

Tað hevur tikið tíð og hevur verið 'ordiliga hart', men Samuel Chukwudi er nú komin fyri seg aftur, og tá A-landsliðið skuldi spæla venjingardystir ímóti Kekkia og Kosovo, vóru boð eftir honum frá Håkani Ericson fyri fyrstu ferð.

 - Tað er sjálvandi nakað, sum nógvir spælarar droyma um, so tað eri eg øgiliga errin av og glaður fyri at sleppa at uppliva, sigur Samuel Chukwudi.