Íbúðarbygging í leysum lofti

Á sumri 2020 keypti Fuglafjarðar Kommuna seks íbúðir, sum kommunan skal leiga út til fólk í kommununi, 60 ár og eldri. Íbúðirnar eru partur av eini nýggjari íbúðarbygging í býnum, har tilsamans 18 leiguíbúðir skulu byggjast.

Íbúðir í Fuglafirði, Fuglafjørð, Fuglfjarðar kommuna

Endaliga skeytið um tær seks íbúðirnar er undirskrivað av Sonna á Horni, táverandi borgarstjóra, og Eyðfinn Reyðberg, umboðandi P/F Toftanes, 2. juli 2020.

Sambært skeytinum kosta tær seks íbúðirnar tilsamans 13,05 milliónir krónur. Ein fjórðingur av prísinum, 3.262.500 krónur, skal gjaldast beinanvegin.

P/F Toftanes er tó ikki til og hevur ongantíð verið til. Tað váttar Skráseting Føroya.

Av ymsum orsøkum verður íbúðarætlanin flutt á eitt annað stykki við síðuna av, sum sp/f Toftanes 2 keypir frá kommununi seinni.

Íbúðir í Fuglafirði, Fuglafjørð, Fuglfjarðar kommuna

Hóast staðsetingin verður flutt - og hin parturin nú er eitt smápartafelag við øðrum navni - so er avtalan framvegis, at Fuglafjarðar Kommuna skal gera alt økið byggibúgvið til tær 18 íbúðirnar.

Tað veri seg planering, stuðlaveggir móti lendinum, trappur, lyftir, skráningar, parkeringspláss, tún, ljós og so framvegis.

Íbúðir í Fuglafirði, Fuglafjørð, Fuglfjarðar kommuna

Kommunala útreiðslan á stykkinum, sum sp/f Toftanes 2 also eigur, er tilsamans umleið 17 milliónir krónur.

Dávur Juul, Íbúðir í Fuglafirði, Fuglafjørð, Fuglfjarðar kommuna

Í dag, tvey ár og átta mánaðir eftir at Fuglafjarðar Kommuna keypti seks íbúðir frá P/F Toftanes, hevur kommunan framvegis ongar íbúðir fingið. Dávur Juul, borgarstjóri í Fuglafirði, veit í dag ikki við vissu, nær íbúðirnar verða lidnar.

Íbúðir í Fuglafirði, Fuglafjørð, Fuglfjarðar kommuna

Torben Nielsen, stjóri í sp/f TN Bygging, sum skal byggja íbúðirnar fyri felagið hjá Eyðfinni Reyðberg, upplýsir, at arbeiðið tekur 18 mánaðir. Tí verða íbúðirnar væntandi lidnar á sumri 2024, sigur hann.

Kringvarpið royndi allan dagin í gjár at fáa fatur á Eyðfinni Reyðberg, men til fánýtis.

Eldri borgarar fegnaðust

1. september í 2020 var eitt innslag í Degi og viku, har eldri borgarar í Fuglafjarðar kommunu søgdu seg fegnast um, at leiguíbúðir nú blivu bygdar í býnum. 

Viðlíkahald av sethúsum er ein avbjóðing, tá fólk koma upp í árini. 

Signar á Brúnni

Sí innslagið HER. 

Í somu Degi & Viku var drúgv umrøða av íbúðarbyggingini í Fuglafirði, har eisini varð tosað við hjúnini Annu & Jógvan Martin Joensen, Sonna á Horni, táverandi borgarstjóra í Fuglafirði, og Eyðfinn Reyðberg, stjóra í "P/F Toftanes". Sí alla sendingina HER.