Føroyskt met og silvur í trístøkk

Føroyar fingu eitt heiðursmerki í frælsum ítrótti á fyrsta kappingardegnum á Oyggjaleikum.

Tað syrgdi Bára Jógvansdóttir Glerfoss fyri, tá hon setti nýtt føroyskt met og vann silvur í trístøkk við einum lopi upp á 10.97.

Hon endaði bert fýra sentimetrar aftanfyri vinnaran, Lucy Woodward, úr Jersey.

Fleiri innleiðandi kappingar vóru á Footes Lane-leikvøllinum, har nógv fólk var komið at hyggja. Tað gekk sum heild væl, og fleiri runnu seg víðari.

Í morgin skulu Oddvør Josephsen og Maria Biskopstø renna finalu á 400 metrum, og tað skulu Jónas Isaksen og Dánjal Dahl Ljósheim eisini. Sunniva Bogadóttir skal kappast í spjótkasti, og Eiri J Glerfoss skal renna 100 metur hálvfinalu - og finalu, um tað gongur væl.