Ljósið vann frálíkan fagnað

Tað var javnt. Tað var sera javnt.

Tað løgdu dómararnir dent á, eftir at tey fimm luttakandi fimleikafeløgini høvdu verið á gólvinum í Norðurlandahúsinum fyri seinastu ferð sunnudagin.

Tá tað kom til skarpskeringar, var framførslan hjá Ljósinum kortini hon, sum stóð sterkast.

Spæligleði, hugflog, breidd og orginalitetur vóru nakrar av dygdunum, sum dómararnir knýttu at framførsluni hjá vinnandi felagnum.

 - Vit hava hugsað nógv um at fáa allan pallin og allar kenslurnar við í spæl, og eg haldi, at vit vunnu, tí vit vóru øðrvísi og tí, at tað var listarligt, segði Margreta Eyðunsdóttir Samuelsen, íðkari og venjari í Ljósinum.
 
Ljósið lýsti evni pátrúgv við framførslu um stjørnuspeki og vann fyri fjórðu ferð.

Havnar Fimleikafelag, Klaksvíkar Fimleikafelag, Fimleikafelagið Støkk, Fimleikafelagið Flog og Fimleikafelagið Ljósið vóru við á fagnaðinum, har eini 500 fimleikarar vóru á gólvinum.