Familjuviðurskifti og viðhaldsfólk á norska breddanum

Stórur áhugi var fyri hondbóltslandsliðnum millum norsku miðlarnar, sum vitjaðu føroysku leguna fyrrapartin.

NRK, TV2 og Viaplay vóru øll komin at spyrja nærri um føroyska hondbóltsævintýrið. Føroysku viðhaldsfólkini, sum gjørdu vart við seg á Mercedes Benz-Arena í gjár, og familjuviðurskiftini í føroyska hópinum vóru ovast á norska breddanum.

 - Vit sóu allar 5000 føroyingarnar, sum eru komin higar, á Mercedes Benz-Arena í gjár, og løgdu merki til serliga huglagið, sum tey skaptu, sigur Frode Søreide frá NRK.

 - Eg búgvi á gistingarhúsi saman við nógvum av hesum føroyingunum, og tað er sum at vera í Føroyum, tá vit eta, fortelur Anja Borg frá TV 2.

Regine Anthonessen frá Viaplay hevur serliga stóran áhuga fyri familjuviðurskiftunum í føroyska landsliðshópinum. 

 - Tað er jú sjálvsamt, at so nógv eru í familju á sama liði, greiðir hon frá.

 - Tú hevur tvey beiggjapør, sum eisini eru systkinabørn. So er mamman forseti og pápin mentalvenjari.