Óli Mittún: Inspiratión úr Íslandi

 - Ísland var aftanfyri við tveimum, tá 30 sekund vóru eftir, og tað er tað sama, sum hendir í dag.

Tað segði fótfimi bakkurin, Óli Mittún, tá hann varð spurdur, um føroyingarnir framvegis trúðu upp á tað, tá 11 sekund vóru eftir, og Norra hevði bóltin.

 - Eg veit ikki, hvussu góðir liðfelagar Elias og Reinkind vera, tá hann kemur aftur til Kiel, legði hann smílandi afturat.

Tað var Elias Ellefsen á Skipagøtu, sum stjól bóltin frá makkaranum úr THW Kiel, Haraldi Reinkind, sum afturfyri mátti hála føroyingin umkoll og geva burtur brotskast.

Tordi tú at hyggja, tá Elias skuldi skjóta?

 - Ja, tað gjørdi eg, men eg veit ikki ordiliga, um eg minnist nakað, sum hendi tá. Har komu túsund tankar í mítt høvd, og hetta er sjúkt, hetta er sjúkt, segði Óli Mittún, sum skeyt trý mál upp á fimm royndir í 26-26 javnleikinum.

Nú ber framvegis til at spæla seg víðari hjá føroyingunum, men til tað krevst sigur ímóti Póllandi mánakvøldið, samstundis sum Slovenia skal vinna við trimum ella meir ímóti Norra.