Jonas Wille: Øll æra til Føroyar

Norski venjarin, Jonas Wille, vildi ikki so fegin tosa við Kringvarpið eftir javnleikin ímóti Føroyum leygarkvøldið.

Ei undur í; Norra tveitti eina trygga leiðslu burtur síðstu løtuna, og so kundu føroysku spælararnir fegnast um eitt søguligt EM-stig eftir dramatiskan brotskastsenda við Eliasi Ellefsen á Skipagøtu í høvuðsleiklutinum.

 - Øll æra til Føroyar, sum spæla ein frálíkan dyst. Teir hava uppiborið at hátíðarhalda hetta, tí tað, teir hava fingið burtur úr, er merkisvert, segði Jonas Wille.

Hann viðgekk, at ein slík niðurbræðing, sum var hansara liði fyri til endans, ikki eigur at henda fyri Norra.

 - Nei, sjálvandi eigur tað ikki at henda, men vit eru óhepnir í støðuni, segði norski venjarin, sum annars ætlaði, at Norra skuldi fáa fult stigatal við sær úr bólkaspælinum.