Feskur víkingur í landsliðshópinum

Eitt spildurnýtt navn var á listanum hjá Håkani Ericson mánadagin.

Arnbjørn Svensson úr Víkingi var nevniliga tikin út til A-landsliðshópin, sum skal royna seg í venjingardystum ímóti Liktinstein og Danmark seinni í mars.

 - Tað er heilt fantastiskt. Eg eri bilsin, øgiliga glaður og errin, og tað er nakað, sum allir fótbóltsspælarar í Føroyum droyma um, segði Arnbjørn Svensson.

Farna kappingarár spældi Arbjørn Svensson mest í miðverjuni í Sarpugerði, har hann avloysti Gunnar Vatnhamar undir liðini á Atla Gregersen.

Landsliðsvenjarin ætlar kortini at brúka hann á miðvøllinum, har víkingurin eisini hevur spælt.

 - Eg haldi, at hann hevur góðan bóltførleika. Hava hava sum kunnugt ikki Jákup Andreasen við hesa ferð, sum er ein bóltsterkur seksari, og eg haldi, at Arnbjørn hevur eginleikar, sum gera, at hann kann spæla í tí plássinum, segði Håkan Ericson.