Teir ungu vístu seg fram

Yngru kreftirnar á landsliðnum stóðu seg væl í 2-0 tapinum fyri Danmark, helt føroyski málverjin, Mattias Lamhauge.

Hann stóð sjálvur ein góðan dyst í føroyska málinum, og var yvirhøvur væl nøgdur við føroysku verjuna, har millum annað Andrias Edmundsson og Hanus Sørensen spældu væl.

 - Nú hava vit onkrar, sum eru úti við skaða, og so traðkar eitt yngri ættarlið inn í staðin fyri, og eg haldi ikki, at tað var nakað at seta fingurin á ordiliga, so tað var stuttligt og góðkent.

Væntaði eitt innlegg

Einasta spurnartekn, sum kundi setast við avrikið hjá aftasta skansanum, var viðvíkjandi hansara leikluti í seinna málinum hjá Danmark.

Christian Eriksen slapp ígjøgnum í høgru, og av baklinjuni lyfti hann bóltin uppum málverjan, sum hevði flutt seg eitt fet út frá stongini, og tí ikki rakk bóltinum, sum Mohamed Daramy setti í netið úr stuttari frástøðu.

 - Eg taki eitt fet til høgru fyri at forða fyri innlegginum, men so lyftir hann bara bóltin genialt inn um, segði Mattias Lamhauge, sum í løtuni má roknast sum fyrsti málverji frammanfyri Teit Matras Gestsson og Bárð á Reynatrøð.