Skúgvur vann sín fyrsta róður í ár

Hvalurin av Eiði hevði vunnið allar FM-róðrarnar, tá seksmannaførini við monnum settust við árarnar í fjarðastevnu síðsta vikuskiftið.

Tá gekk ikki longur. Í einum framúr spennandi róðri, har minni enn eitt sekund var ímillum tríggjar teir fremstu bátarnar, fór Skúgvur úr Sandavági fyrstur um málið og fekk sín fyrsta sigur í ár.

 - Hatta var ein ræðuliga harður róður. Eg havi ikki opplivað sovorði fyrr, segði Símun Tórur Joen-Jacobsen á Skúgvi.

 - Deyðsjógvurin her í Vestmanna er nokkso tungur at rógva í.

Hetta er fyrstu ferð, tit vinna. Hava tit gjørt nakað øðrvísi?

 - Nei, vit hava bara knoklað og vant ordiliga hart og rættað teir feilirnar, sum er, segði Símun Tórur Joen-Jacobsen á Skúgvi, sum ætlar at vinna teir róðrarnar, sum eftir eru.