Turrdokk fyri 100 til 200 milliónir

Eftir sjey ár og fleiri broytingar er nú endiliga klárt at fara í gongd at gera turrdokkina á Skála.

Talan er um eina stóra verkætlan, sum nógv fólk hava mótmælt, og sum fleiri ferðir er broytt. 

Í 2017 ætlaði Mest at gera ein innilokaða dokk, sum skuldi vera yvir 40 metrar høg og 129 metrar lang. Hetta fekk øði í skálafólk.

Í 2020 broytti Mest ætlan. Nú skuldi ein dokk gerst á Tjørnunesi, norðanfyri bygdini Undir Gøtueiði.

Í 2021 broyttust ætlanirnar aftur. Nú skuldi ein dokk gerast afturat verandi dokk á Skála. Hesaferð skuldi hon ikki innilokast. Hon skuldi vera 25 metrar norðanfyri verandi dokk. 

Í 2023 vóru ætlanirnar aftur broyttar. Nú var kajkanturin fluttur 50 metrar út í sjógvin. Tað er henda verkætlanin, sum Mest fekk endaligt byggiloyvi til í gjár.

Øll uttan Norrøna

Tað er Articon, sum skal gera dokkina. Eftir ætlan verður spakin settur í í heyst og hon verður liðug í 2026.

- Prísurin verður yvir hundrað milliónir, sigur Mouritz Mohr, stjóri á Mest.

Øll tey føroysku skipini passa í dokkina, tað er bara Norrøna, ið ikki passar inn.

Tá ið nýggja dokkin verður tikin í nýtslu, væntar Mourtitz Mohr, at Mest hevur tørv á 60 til 70 starvsfólkum afturat.