Venjarin væl nøgdur við stigið

Føroyska manslandsliðið í fótbólti legði fyri við javnleiki ímóti Norðurmakedónia í Nations League-kappingini, sum byrjaði í sólini á Tórsvølli í dag.

Venjarin, Håkan Ericson, var eisini stak væl nøgdur við eitt stig, hóast hann ikki fekk latið vera við at iðra seg um, at hann ikki fekk øll trý.

 - Teir hava nakrar heilt stórar kjansir, men tað hava vit eisini, og vóru vit hepnir, vunnu vit dystin. So eg eri væl nøgdur, men samstundis eitt sindur vónbrotin, segði landsliðsvenjarin.

Føroyar løgdu seg framum longu í 9. minutti, tá Viljormur Davidsen sendi brotsspark í netið, men beint eftir steðgin tók Enis Bardhi av, tá hann eisini fekk kjansin frá ellivu metrum.

Avloysararnir stóðu royndina

Nógv hevur verið gjørt burturúr, at fleiri av teimum royndastu spælarunum ikki vóru tøkir til dystin av ymsum orsøkum. 

Nevnast kunnu miðvallararnir Brandur H. Olsen, Jóannes Bjartalíð og Jákup B. Andreasen, meðan bæði Mattias Lamhauge og Teitur M. Gestsson eisini máttu geva avboð.

Sigast má kortini, at avloysararnir stóðu royndina í dag. Bárður á Reynatrøð hevði eina frálíka bjarging í seinna hálvleiki, meðan ungu miðverjarnir Andrias Edmundsson og Samuel Chukwudi spældu væl í føroysku verjuni. Á miðjuni stóðu bæði Hanus Sørensen og Meinhard Olsen, sum aftur er klárur, sterkir í myndini.

 - Onkur er byrjaður at spæla aftur fyri kortum og er tí ikki hundrað prosent til reiðar, men vit spæla við teimum, sum eru tøkir, og eg haldi, at teir arbeiða stak væl, segði Håkan Ericson, sum ásannaði, at skal Føroyar vinnu slíkar dystir, er neyðugt, at liðið er neyvari í teimum avgerandi støðunum í bæði verju- og álopsstøðu.