Meinhard Olsen: Eg kundi vant aftur í morgin, um tað er

Tað var eyðsæð, at Meinhard Olsen gleddist um at spæla aftur á Tórsvølli. 

Vongurin hevur verið leingi uttanfyri við knæskaða, men hann taldist millum eyðsýndastu spælararnir í javnleikinum ímóti Norðurmakedónia. 

 - Eg kendi meg væl. Eg spæli so at siga allar dystirnar í Norra og kenni, at eg orki øgiliga væl at renna. Eg eri kanska ein sterkari útgáva av mær sjálvum, enn eg var áðrenn skaðan, segði Meinhard Olsen.

Runavíkingurin gjørdi tað, sum ofta hevur manglað á manslandsliðnum. Hann rann aftur um norðurmakedónsku verjuna og bjóðaði av ein ímóti einum, tá tað bar til. 

Føroyar løgdu seg framum longu í 9. minutti, tá Viljormur Davidsen sendi brotsspark í netið, men beint eftir steðgin tók Enis Bardhi av, tá hann eisini fekk kjansin frá ellivu metrum.

Heimaliðið hevði fleiri kjansir eftir steðgin, men norðurmakedónararnir høvdu helst hin størsta, og tí var javnleikur helst á góðari leið.

 - Har vóru góðir møguleikar, serliga í bakrúminum, og vit fingu revsað teir upp á tað í fyrra hálvleiki, men so er tað tær síðstu lítlu avgerðirnar, tey síðstu lítlu tingini í skot- og innleggstøðum, har vit kunnu taka øll trý stigini. Men sum heild haldi eg, at har vóru góðir tendensir, segði Meinhard Olsen.

Týsdagin spæla Føroyar aftur í Nations League. Tá tekur Lettland ímóti á Skonto-leikvøllinum í Riga.