Meinhard Olsen: Eitt stig aftur

Eitt stig aftur.

Tað kallaði føroyski vongurin Meinhard Olsen avrikið í 1-0 tapinum fyri Lettlandi í mun til javnleikin ímóti Norðurmakedónia leygardagin.

 - Tað eru ymiskar orsøkir til tað. Vit kláraðu so at lyfta okkum í seinna hálvleiki, og høvdu nakrar góðar støður, men Lettland er betri enn vit í dag, og eg haldi ikki, at vit kunnu vera glaðir fyri okkara avrik, serliga í fyrra hálvleiki, segði Meinhard Olsen.

Mugu raka málið

Føroyar hava skorað eitt mál í tveimum Nations League-dystin higartil, og tað kom upp á brotsspark ímóti Norðurmakedónia. Á Skonto-leikvøllinum misnýttu bæði Gunnar Vatnhamar og Petur Knudsen góðar málkjansir.

 - Um vit klára, at fáa nøkur skot á málið, koma vit eisini at skora mál. Sjálvt um vit høvdu 10 skotroyndir seinast, høvdu vit bert tríggjar á málið og ein var brotssparkið. So vit mugu raka innanfyri málstengurnar, so skal tað nokk loysna hjá okkum. Støðurnar koma, og tær koma í hvørjum dysti, so eg haldi ikki, at vit skulu fella í fátt, segði Meinhard Olsen.