Håkan Ericson: Hjartaliga vónsvikin

Håkan Ericson segði seg vera 'hjartaliga vónsviknan' eftir javnleikin ímóti Lettlandi í Nations League sunnukvøldið.

Landsliðsvenjarin hevði enn einaferð sæð sínar menn leggja seg á odda - Hanus Sørensen skeyt sítt fyrsta landsliðsmál fyri steðgin - men mátti aftur síggja eitt mótstøðuliðið javna á ein hátt, sum hann fanst hvassliga at.

 - Eg eri sera ónøgdur við málið, sum vit lata ígjøgnum. Vit eru ódjarvir í støðuni, segði Håkan Ericson.

 - Vit hava tosað um, at vit ikki skulu fella og bakka. Vit hava gjørt tað fleiri ferðir fyrr. Ímóti Kekkia, Moldova og Lettlandi. Vit hava tosað um tað so ofta, men kortini gera vit tað.

69 minuttir vóru spældir, tá Andrejs Ciganiks fekk pláss vinstu megin, og fann Dario Šits, sum hevði runnið seg púra leysan í føroyska brotsteiginum.  

Føroyar sótu á stórum pørtum av dystinum, men høvdu kortini sera ilt við at spæla seg til góðar kjansir.

 - Eg haldi, at vit hava bóltin 68 prosent av dystinum í mun til teirra 32, og tá skulu vit vinna, segði landsliðsvenjarin.