Páll og Hallur við aftur

Eitt, tvey, trý, og so vóru Páll Andrasson Klettskarð og Hallur Hansson við aftur í føroyska landsliðshópinum.

 - Eg hevði kenslu av, at tað vóru tríggir spælarar, sum ikki vóru tøkir, og vit spurdu teir, um teir vóru tøkir til hetta síðsta (Armenia og Norðurmakedónia, red.), og vit fingu tvey játtandi svar, og teir hava vit so tikið út, segði Eyðun Klakstein, sum hevur ábyrgdina av teimum báðum síðstu Nations League-dystunum hjá Føroyum, sum verða í næstum.

Triði spælarin er Árni Fredriksberg, men støðan hjá KÍ-vonginum er hin sama, sum hon hevur verið í nógv ár. Hann er framvegis ikki tøkur.

Páll Andrasson Klettskarð og Hallur Hansson sótu ikki væl um sátt við Håkan Ericson, sum varð uppsagdur í oktober, men nú Eyðun Klakstein og Atli Gregersen ráða fyri borgum, eru KÍ-menninir aftur til reiðar at tørna út í hvítum.

 - So tað er ikki meir innviklað, enn at vit hava spurt, um teir vilja vera við, og teir hava sagt ja. Tað eru ongar avtalur um, at teir skulu spæla. Teir eru klárir aftur, og vit halda, at vit hava brúk fyri bæði Pálli og Halli, segði Eyðun Klakstein.

Føroyar spæla ímóti Armenia 14. november og ímóti Norðurmakedónia tríggjar dagar seinni. Báðir dystirnir eru á útivølli.