Nýtt stev og gamlir kenningar á landsliðnum

Nógv er nýtt á fótbóltslandsliðnum við monnum, sum seinni í vikuni skal spæla tveir teir síðstu dystirnar í Nations League-kappingini. 

Nýtt venjarapar hevur ábyrgdina, og fleiri hálv- og heilfeskir spælarar eru í flogfarinum, sum mánakvøldið setti kós ímóti Armenia, men tveir gamlir kenningar eru eisini við á ferðini.

Bæði Hallur Hansson og Páll Klettskarð eru tiknir út og klárir at tørna út í hvítum fyri fyrstu ferð í langa tíð.

 - Eg havi havt Eyðun (Klakstein, red.) sum venjara og spælt saman við Atla (Gregersen, red.) eisini, bæði í klubbfótbólti og eisini á landsliðnum, so teir kenni eg øgiliga væl, segði Páll Klettskarð til seinastu venjingina í Føroyum, sum var fríggjadagin.

Broytingar verða gjørdar

Umframt broytingarnar í sjálvum hópinum - Poul Kallsberg og Ási Dam eru við fyrstu ferð, og millum annað Jóan Símun Edmundsson og Klæmint A. Olsen eru vrakaðir - verða smáar broytingar eisini gjørdar í leikskipan og -ætlan.

 - Vit verða noyddir at lena okkum nakað upp at tí, sum hevur verið, segði Eyðun Klakstein.

 - Men vit kunnu justera tað nakað. Vit kunnu hava nýggj prinsippir, sum vit halda gevur meining í tveimum truplum útidystum. Vit koma at verja saman, og vit koma at spæla eitt sindur meir beinleiðis, segði venjarin, sum fyribils er settur at taka sær av hesum báðum dystunum.

Dysturin ímóti Armenia verður spældur hósdagin, og sunnudagin tekur Norðurmakedónia ímóti. Kringvarpið sendir báðar dystirnar í sjónvarpinum.