Holocaustdagur uttan Amnesty

Støðan í Gasa kundi ikki viðgerast á hesum tiltakinum, og tað kunnu vit ikki standa inni fyri. Tað sigur Turið Maria Jóhansdóttir, aðalskrivari í Amnesty Føroyum, nú felagsskapurin valdi ikki at luttaka í føroyska holocaustdegnum. 

Nám skipaði fyri fyri holocaustdegnum - í ár varð sjóneykan sett á fólkamorðið í Kambodja fyri 50 árum síðan.

"Vit valdu at trekkja okkum, tí vit fingu boð um at samrøðan við Marjuna Syderbø Kjelnæs um bókina 'marta marta' skuldi takast av skrá." Greiðir Turið Maria Jóhansdóttir frá. 

Bókin hjá Marjuni Syderbø Kjelnæs snýr seg um eina føroyska gentu, sum er í kibbutz í Ísrael. Hon umrøðir eisini viðurskiftini millum Ísrael og Palestina. 

Tá bókin bleiv tikin av skrá, so merkti tað eisini, at støðan í Gasa bleiv tikin av skrá. Tað kundu vit í nevndini ikki standa inni fyri, sigur aðalskrivarin í Amnesty Føroyum. 

Kringvarpið hevur roynt at fingið viðmerking frá Eyðuni Gaard, stjóra í Námi, men tað hevur ikki eydnast.