Patrik: Ein øgilig kensla

Fimm minuttir vóru eftir av dystinum ímóti Gibraltar, tá innskifti Patrik Johannesen fekk eitt flatt innlegg frá Jóannesi Kalsø Danielsen.

Framherjin úr KÍ setti høgra fótin á bóltin, og bæði gleðin - og ikki minst lættin - á Tórsvølli vóru týðilig, tí nú vóru Føroyar á sigurskós.

 - Tað er ein øgilig kensla at skora fyrsta málið fyri landsliðið á Tórsvølli, segði Patrik Johannesen beint eftir dystin.

Gibraltar legði seg framum í fyrra hálvleiki, og hóast heimaliðið hevði bóltin nógv, gekk illa við at fáa útjavnandi málið. Ikki fyrrenn 20 minuttir vóru eftir, eydnaðist tað, tá Árni Frederiksberg ikki gjørdi mætari enn at senda eitt horna beinleiðis í málið úr høgru.

 - Eg haldi, at vit spæla ein fínan kamp í dag. Vit skapa nokk av kjansum, og at tað er akkurát eg, sum avgeri tað, er kanska eitt sindur tilvildarligt, segði Patrik Johannesen.

SÍ EISINI: MÁLINI: Árni og Patrik ornaðu paragraffirnar eftir steðgin