Ikki nøgdur fyrrenn vit fáa skalpin

Landsliðsvenjarin byrjaði við at rósa spælarunum fyri eitt gott avrik ímóti krútsterku kroatunum á Tórsvølli, men tað sást á andlitsbránum, at eitt 'men' fór at koma.

 - Men eg verði ikki ordiliga nøgdur, fyrrenn vit fáa handan skalpin. Fyrrenn vit fáa stig, segði Eyðun Klakstein.

Hann hevði sæð sínar menn vart manniliga, ein málmann, sum bjargaði ferð eftir ferð, og fleiri skjótálop, sum góðu stórar málkjansir. Tíverri eydnaðist tað ikki Hanusi Sørensen, sum átti tveir teir størstu, at skora, meðan Andrej Kramaric var ísakaldur, tá hann fekk kjansin í 31. minutti.

 - Ein eitt sindur tilvildarlig støða, og so er ein maður leysur upp á ein leysan bólt innfyri, segði Eyðun Klakstein.

 - Men um tað er nakað, sum eg skal iðra meg um, so er tað, at vit ikki skora tað fyrsta málið. Vit hava ein risakjans, kanska tveir. Ein ordiliga stóran og ein nokkso stóran kjans, áðrenn teir koma inn í dystin. Tað hevði ikki verið so galið at fingið eitt mál, segði landsliðsvenjarin beint eftir dystin.

Nú ferðast landsliðið til Gibraltar, og var tapið ímóti Kroatia onkursvegna ókeypis, hevur tað stóran týdning at vinna á kappingarneytunum í niðara endanum av stigatalvuni.