Málskjúttin: Fingu dystin vit roknaðu við

Andrej Kramaric gjørdist einasti málskjúttin á Tórsvølli, tá Kroatia vann tepran sigur á stríðsfúsu føroyingunum, sum iðraðu seg um, at einki stig spurdist burturúr góða avrikinum.

Hoffenheim-framherjin var ikki bilsin av, at dysturin ímóti Føroyum gjørdist torførur.

 - Vit fingu tann dystin, vit høvdu roknað við, segði Andrej Kramaric, sum skallaði bóltin í netið eftir gott innlegg úr høgru síðu, tá 31 minuttir vóru spældir.

 - Vit vistu, at vit máttu taka av okkara kjansum, tí vit fóru ikki at fáa nógvar her, segði framherjin, sum spáddi, at onnur lið eisini fara at fáa trupulleikar á Tórsvølli.