Martin var errin av avgerandi málinum

Málið prógvaði kanska júst, hví Martin Agnarsson var valdur at byrja inni á vinstra vongverja ímóti Gibraltar. 

Hann er ungur, kvikur og rennur sólina svarta. Tí var tað, hann stóð heilt inni undir málinum, tá bólturin lendi fyri føtur hansara, tá Brandur H. Olsen royndi seg við skoti, sum málverjin bert hálvbjargaði.

Fyrrverandi B36-spælarin var ísakaldur, og setti bóltin í handara síðunet.

 - Tað eri eg ótrúliga errin av. Í fyrsta umfari fyri at byrja inni. Tað eri eg sera takksamur fyri. Og so gekk tað eisini væl, og tað var ikki verri við einum máli, segði Martin Agnarsson eftir 1-0 sigurin.

Eina lítla løtu mátti hann kortini halda ondini. VAR-dómarin kannaði, um hann stóð í rangstøðu, men skjótt var greitt, at so var ikki.

 - Ja, oh my God, eg var bangin fyri, at hann fór at taka málið aftur. Tað má eg siga, men tá eg sá, tað var góðkent, var tað ein fantastisk kensla, segði málskjúttin.

Gibraltar megnaði ongantíð at svara aftur, og tí fingu Føroyar seks stig burturúr teimum báðum dystunum ímóti Gibraltar. Í oktober vitja Montenegro og Kekkia á Tórsvølli, áðrenn Kroatia tekur ímóti í síðsta dystinum í november.